LA0620TUF演讲稿.docVIP

LA 0620 TUF演講稿 台語長篇小說《復活的人》的創作經驗佮西拉雅身世書寫 /胡長松 主辦單位、各位鄉親朋友、逐家午安、逐家好： 真感謝TUF台灣人聯合基金會的邀請，予我這个機會來到加州佮逐家分享我的創作《復活的人》，最主要，我會佇今仔日的時間佮逐家討論關係身世佮認同的問題，這是為著欲回答：咱是啥人？咱的生存是啥物？咱的存在欲按怎對這个多元、甚至紛亂的世界做出回應？咱心靈的故鄉佇佗位？咱終其尾欲轉去到佗位？等等問題，這是濟濟世界文學作品的主題，嘛是我這本小說內面探討的主題。 其實我真早就想欲來美國看覓咧，我對這个國家的興趣佮基本的理解嘛是來自文藝，當然這馬的美國文化已經是世界性的強勢文化，全世界的人攏咧看美國的電影、電視劇，加州本身就是現此時世界文化的焦點；毋過，我對這个國家的認識，閣有其他的部份，彼就是怹的文學佮民謠，尤其對我本身的文學有相當影響的Mark Twain、Whitman、Hemingway、Steinbeck遮的文學家，閣有對S. Froster到現代Bob Dylan的濟濟民謠。我讀Steinbeck寫《憤怒的葡萄》，內面做田的散赤人予有錢人壓迫，幾十萬家庭位怹的故鄉離鄉2000哩欲到加州討趁，欲走揣怹活命的新天地，我自然就聯想著受著強權獨裁的台灣人的命運，想著嘛有濟濟台灣人無欲認輸，為著追求新的天地去到全世界拍拚，其中嘛有濟濟就是在座的各位，來到Steinbeck所寫的加州，按呢，我對Steinbecker的文學，就閣加一重屬佇咱台灣人的理解。 這是文學書寫「走揣」佮「歸鄉」的原型，「走揣」佮「歸鄉」的一切理由佮一切的目標，就是咱的「自我」。比Steinbeck閣較早的詩人Whitman，伊佇《草葉集》的〈Song of Myself〉按呢寫： I CELEBRATE myself, and sing myself, And what I assume you shall assume, For every atom belonging to me as good belongs to you. I loafe and invite my soul, I lean and loafe at my ease observing a spear of summer grass. My tongue, every atom of my blood, formd from this soil, this air, Born here of parents born here from parents the same, and their parents the same, …….. Whitman所欲走揣的美國人的自我，佮台灣人佇濟濟文學創作咧走揣台灣人的自我，是出佇仝款的理由，嘛佮我欲佇《復活的人》這本小說欲走揣自我，出佇仝款的理由。阮攏想欲佇文學內面，揣著彼个屬佇家己民族的永遠的故鄉。 美國民謠之父Frost有一首民謠叫做〈Old Folks at Home〉咧寫烏人族群離鄉拍拚的身世，時常予我感動，彼條歌是按呢唱： Way down upon the Suwannee River, Far, far away, There’s where my heart is turning ever, There’s where the old folks stay. All up and down the whole creation, Sadly I roam, Still longing for my childhood station, And for the old folks at home. All the world is sad and dreary, Everywhere I roam. O dear ones, how my heart grows weary, Far from the old folks at home. 我時常唱這首美國民謠，時常感動，歌詞講怹的故鄉佇遠遠Swanee River彼个所在，遐是怹的心永遠所向的所在，嘛是怹的鄉情停留的所在，佇天地之間，怹悲傷飄搖，閣咧走揣新的徛家，閣咧走揣故鄉的鄉情，毋管怹飄搖去到啥物所在，這个世界就只有悲傷佮厭siān 我最近出版的長篇《復活的人》，有超過28萬字，可能是目前為止篇幅尚長的台語小說，是用五年的時間寫的，伊所探討的問題佮拄才我所講著的故鄉佮離鄉的走揣有真大的關係。 佇故事內底，主角的故鄉是佇一个叫做「番仔厝」的所在，伊的面有一个號，這个號象徵伊時常受著故鄉庄腳的漢文化鄉俗內面的譴損排斥，心內有不滿，就漸漸離鄉，去台北大都市追求較「文明」