粤语书写应避免以口子边造字.docVIP

粤語書寫應避免以口子邊造字 關 於粵語書寫嘅問題，本人想提一啲意見，今日我就著重講下造字嘅問題。粵語書寫，最終離唔開造字，如果好似彭志銘噉，一味 凈係識掘啲古字出嚟（其考證亦相當之粗疏），其實就即係文字領域嘅何文匯，以古為正，實則即欠缺思考，唔理解中文嘅本質。舉個例，譬如話個“佢”字，好多本字流會話你聽， “佢”係俗寫字，應該寫成“渠”；我只可以講，真係唔好意思喇，所謂嘅“渠”都係俗寫字，只不過佢係古人根據當時嘅語音而用嘅俗寫字，而真正嘅本字應該係 “其”，而“其”本身係咪俗寫字，其實亦都可以考證落去。試問現今有邊一種文字係可以脫離語音？拼音文字當然 唔可以，就算係有异於世界大部份語文嘅中文亦都係一樣，唔係嘅話點解中文字會 著噉大半嘅係形聲字？所以，查證粵語本字嘅最大意義就在於，等粵語造字有 一個參考喺度，而唔係天馬行空，亂造一通；同時如果本字係直觀，便於識認嘅，亦都可以直接用本字，譬如話“畀”“耷”“屌”等等，而唔使再造啲俗寫 “俾”“dup”“門+小”。之但係，嚟到本文嘅中心點，就係“粵語書寫應避免以 口子邊造字”，就正如“踢走懶音”走火入魔就演變成何文匯妖音，本人覺得滋生本字流嘅土壤或者就係民間口子邊造字嘅氾濫。當然，前文經已分析過用字“以古 為正”嘅荒謬，不過我哋而家嘅口子邊造字亦的確係過於求其，譬如話“呢度”嘅“呢”字，由於用口子邊造字，以及受書面語嘅影響，有啲人為咗唔好同書面語 “怎麼呢”嘅“呢”混淆，所以就造多咗個“哩”字；又或者，由於太多粵語常用字帶口子邊，喺字庫未有呢啲字嘅時候，好多人都習慣以“o既”“o野”“o係”嚟表示，但由於麻煩，亦有唔少人會直接打啲冇口子邊嘅字上 去，造成“既然係我既事，關你乜事”“隻野狗係度做乜野”嘅呢啲怪行文，而情況去到而家，好多用字喺字庫都已經補充咗都未曾有改善。而呢啲造字嘅求其更加有惡化嘅趨勢，好似個“喐” 字，以“郁”為聲旁，“扌”做部首，其實就相當之直觀，點解仲要造一個睇唔出詞性嘅“喐”字出嚟？喺最後，本人嘗試攞啲口子邊嘅常用字嚟一次再造，唔 係話要推翻我哋粵語嘅常用字，而係意在抛磚引玉，等我哋往後嘅造字，造得更合理嘅啫。