这个家是桧木撑起的-云林立建国国中.DOC

104雲林縣 縣立 建國國民中學【本土語言課輔】教材 主題︰《台語現代詩-創作教學運用》 時間：104年10月24日~105年1月9日 地點：建國國中-閩南語教室 授課：陳綉燕 電話：05-7826246 手機仔0915-343-930 tansiuian@.tw 一首詩一個記錄 / 一首詩一個故事 一首詩一個心情 / 一首詩一個感動 一首詩一個思想 / 一首詩一個反省 一首詩一個人生 / 一首詩一個世界 ■母語的音節是心情的旋律，台語的音節，內在精神的節奏「寫天寫地寫家；寫你寫我寫」 阿爹是一座山 伊的手股頭粗閣大 用雙手將阮抱 予阮向前看 予阮知影世界是偌大 阿爹是一座山 阮就是山嶺頂的雲 倚佇伊的心肝 永遠毋甘散 阮若是船 伊就是阮的靠岸 有伊佮阮相伴 阮永遠毋知啥是孤單 2.阿母你無乖 方耀乾 阿母你無乖 自細漢你叫阮著愛乖 飯愛食較濟的 大漢通做大代誌 身體著愛振動跤手勇健 才會行出你的春天 意志著愛堅強 拍拚你的光明前程 阿母你無乖 你飯食一喙喙仔 你跤手無愛振動 你意志嘛無堅強 阮愛予你佮阮作伙做大代誌 阮愛予你佮阮鬥陣 行出咱的春天 阮愛予你看著咱的光明前程 毋過 阿母 你無乖 3.寫予查某囝的心內話 林貴龍 今仔日是你做度晬 看你司奶踮佇塗跤爬 心內毋甘 阿爸的肩胛予你坐 今仔日你欲入學去讀冊 看你制服穿甲真整齊 心內下願 阿爸欲為你做牛做馬 今仔日是你大學畢業典禮 看你提花參同學徛做伙 心內操煩 阿爸請你愛照顧家己身體 今仔日你欲上班踏入社會 看你初次穿著懸踏鞋 心內向望 你會勝過阿爸幾偌百倍 今仔日你欲出嫁 看你是世界上媠的一蕊花 心情沉重 你愛永遠會記得 阿爸交代的話 4.有身十個月 藍淑貞 有身一個月 花胎拍莓欲開花 有身兩個月 心肝糟糟對君說 有身三個月 糜飯袂食 啉嘛吞袂落 有身四個月 跤酸手軟四界撐 有身五個月 輕輕仔挲著腹肚皮 摸著寶貝的氣脈 有身六、七月 怎樣跤來手也挨 有身八、九月 跤步沉重歹轉踅 十月落地開聲啼 阿爸歡喜甲笑嘿嘿 ?《海翁臺語文學雜誌》2002.01.第25期 5.電腦寡婦　李勤岸 阮翁有外遇 佇厝裡 透早起床 三更半暝 伊綿綿精精（m? tsinn） 佮彼隻狐狸精 熱戀死戀 給我拍落冷宮 伊的性生活 愈來愈少佇眠床頂 較濟佇線頂 伊佮電腦做愛遐捷 毋知欲生啥麼雜種仔 我無法度告伊妨害家庭 我無法度掠姦在床 我無法度共伊毀容 想欲去學寫一款程式 會凍予伊的情婦中毒 永遠無法度開機 若無 不如我變做 一臺筆記型細姨仔 ? 原載2001.05《臺灣e文藝》第2期 6.樹菊花開 林沈默 樹菊花開　心茫茫 市場人生濕濕暗 家庭擔頭日日重 賣菜姊仔十三歲喝到大人 紅鳳、青江、小白菜 三把五十、半賣半相送 買芹菜配好婿 買蔥予你嫁媠翁 油菜花頂小蜜蜂 不時飛來問起感情的事項 （臺灣女兒認命操煩， 實在無閒梳頭鬃！） 樹菊花開　金茫茫… 果菜市有起有降 大愛心無振無動 賣菜姊仔粒粒積積數百萬 助貧、濟弱、救苦難 文化寄付起造圖書館 為前人造功德 為後壁孫開福田 勞勞碌碌四十冬 不管青春火車已經過車站 （臺灣女兒歡喜圓夢， 光光彩彩電頭鬃！） 樹菊花開、媠茫茫… ?刊佇《自由時報．自由廣場》2005.05.23 7.紅唇族的哀歌 藍淑貞 懸懸的菁仔欉　生做媠噹噹 舉著癌症的招魂旗　隨風搖弄 小小一粒菁仔籽　 生做幼嫩好食款 隱藏魔鬼的心腹　 失去靈魂的主人 苦澀的原汁　 當做甘甜的仙丹 哺著綠色的銃子　 呸出紅色的血汁 陰琛的墓仔埔 有人咧巡視 無論黃昏抑暗暝　舉著招魂旗 引規排的靈魂咧揣位 喙開開　閣流血水 喙齒落甲無半支 喙phué爛甲離離離 睏佇塗跤的人 驚甲無塊覕 無愛佮伊睏共位 搋開失神的目睭　 看天頂的星 看月娘咧看伊　 想欲倒轉去 招魂旗講　天堂你袂使去 因為青山不再嬌媚 血汁染紅溪水 飛鳥唱出悲傷的歌詩 月娘揣無好景緻 福爾摩沙的哀歌唱袂離 ? 選自《臺灣圓仔花》2005.3出版 8.有一日我死時　陳明仁 有一日 我死的時 請為我唱一條歌 佇追思禮拜的時陣 毋是安魂鎮靈的歌詩 死亡是我的追求選擇 我心平靜 嘛無需要唱哀歌 死亡是一種經驗 無這款經驗 人生袂得圓滿 請佇我的墓前 唱彼條文夏的歌 無聊的人生 有一日，我死--去 請毋免為我悲傷 悲傷 是人生上大的安慰 無閣再有人生的人 哪有需要安慰 嘛免替我刻墓牌 墓牌是刻予活人看 死人免閣看活人的面色 請共世間人講 有一個人佇世間來去 伊無啥物特別 干焦愛唱歌佮愛聽人唱歌 若數念—伊 請佇透風落雨的暗暝 唱彼條伊愛聽的歌 文夏無聊的人生 有一日，我若死 毋免獻花獻果 嘛免香燭輓聯 為我唱彼條歌 我就袂孤單 ■對土地的關懷 9.塗地　　陳正雄 留