牛爱贯鼻人爱教示.docVIP

阿爸常常講的話 作者：廖瑞昌 　　各位評審、各位在座的序大、同學逐家好 　　今仔日我欲演講的題目是「阿爸常常講的話」 聽阮阿公講：較早農業社會，做穡人攏著靠牛拖車、犁田，若欲牛乖乖仔聽話，就愛揀一工仔好日仔，給牛貫鼻，阮阿公講：牛有牛性，若無貫鼻，彼牛性那攑起來就牽袂著。有貫過鼻的牛才會乖乖仔照主人的意思，認真鬥做工課。人嘛相像，若無人教示，是會毋成樣。 欲教示就愛對細漢開始，人講：「魚趁青、人趁茈，毋通喙焦才去挵古井」。嘛有講：「細漢若無熨，大漢著熨袂屈」、「細漢若會偷挽匏、大漢就會偷牽牛」。各位少年朋友啊：咱逐家就愛共序大人的教示，揹佇身軀邊，做人就愛行予正，絕對毋通黑白行，做好人才會出好名聲，行歹路是會無時行。 三字經開始就有講：「人之初、性本善、性相近、習相遠」，意思是講咱人出世的時，本性攏是善良的，日後若無序大人的教示，有可能就會變歹毋成樣。紲落去，閣講：「玉不琢、不成器、人不學、不知義」，亦有講「養不教、父之過、教不嚴、師之惰」。遮的道理攏是咧共咱講，人愛受教。 學校的老師嘛捌共阮講：「細漢若袂曉想，大漢就會毋成樣」。老師常常鼓勵阮愛認真讀冊做好囝，毋通學歹黑白行，父母儉腸凹肚佇外口受風受雨，就是毋甘咱吃苦，咱就愛知影序大人的辛苦，毋通你兄我弟共序大人勞。俗語嘛有咧講：「囡仔人袂使倖、倖囝不孝、寵豬攑灶、寵查某囡仔袂入人家教」。 現代社會的父母，囝仔攏生少，序大人比較較倖囝，毋甘罵嘛毋甘拍，致使囡仔常常坐無坐相，徛無徛樣，較嚴重的，甚至佮人冤家相拍、啥物阿沙不魯的代誌攏濫糝來，等到代誌無法度收煞，才來怨嘆「細空無補、大空艱苦」。 自細漢，我就是一个誠活跳的囡仔，攏按呢無時定著，聽過阿公講的俗語：「牛愛貫鼻、人愛教示」了後，我感覺真有道理，以後我會恬恬仔聽序大人的教示，做一个細漢會曉想，大漢真成樣的好囡仔。 我的演講就講著遮，講了bái逐家莫棄嫌，講了好噗仔聲就共我加減仔催一下，最後祝福逐家闔家平安、萬世如意，感謝逐家！ 母親節彼一日 作者：廖瑞昌 各位老師、各位在座的序大、同學逐家好 今仔日我欲演說的題目是「母親節彼一日」 母親節彼一日，對每一个人來講，就是欲對家己的媽媽表示感恩的日子，一般的人攏會佇這工，用家己的方式來共媽媽慶祝，感謝媽媽的辛苦。 毋過對阮兜來講，母親節彼一日，是一个真特別閣真重要的日子，因為舊年的母親節彼一工，是阮小弟出世的日子。會記得彼一工的暗時，阮規家伙仔佇客廳食雞蛋糕慶祝的時陣，阮媽媽突然間煞感覺腹肚痛，媽媽講伊有可能欲生矣！就佇彼一工，我的小弟出世矣！對阮媽媽來講，彼一工真真正正是「母親」節。 阮媽媽是一个美麗大方、溫柔體貼的好媽媽，過去的母親節，爸爸攏會準備雞蛋糕共媽媽慶祝，感謝媽媽平常時的辛苦，小妹嘛會親手做一張卡片，佇卡片頂面寫一寡祝福的話送予媽媽，嘛會共媽媽講一寡好聽的話，祝福媽媽快樂平安。啊若我，會畫一張圖送予媽媽，圖內面有阮全家伙仔歡歡喜喜食雞蛋糕的畫面。阮媽媽佇這一工，心情總是特別好，這就是阮兜過去佇母親節彼一工，逐家共媽媽慶祝的方式。 這馬我是五年級的學生，想的代誌佮過去較無仝，今年的母親節，對我來講，有無仝款的感覺，尤其是我看著這一年來，阮媽媽對小弟的照顧佮付出，予我真濟的體會佮感受，逐工看媽媽共小弟飼奶、洗身軀、換尿洙仔，我攏會感覺阮兜的囡仔真幸福，有遮呢好的序大人咧共阮照顧。看著厝--裡的情形，我攏會想著學校老師共阮教的俗語「家和萬事成」佮「千好萬好，毋值著咱厝好」這的話。我這个母親節出世的小弟，常常會用伊的「哭聲」共規家伙箍做伙，嘛是因為小弟的愛哭，爸爸、媽媽、小妹佮我有共同的話題，有共同的生活趣味，我想母親節的意義就是佇遮。 爸爸嘛定定共我佮小妹講，逐工攏愛像母親節這工仝款，聽媽媽的話，認真讀冊做一个乖囡仔，我感覺爸爸講的話真有道理，應該共母親節這一工對媽媽的感謝，定定囥佇心肝底。今年的母親節，我欲閣畫一張圖送予我的媽媽，這幅畫內底我會閣加畫一个人喔！遐就是我的小弟啦！ 今仔日，我的演說就講著遮，感謝逐家的分享，多謝逐家。 阮兜上鬧熱的時陣 作者：廖瑞昌 各位老師、各位在座的序大、同學逐家好 今仔日我欲演說的題目是「阮兜上鬧熱的時陣」 若講著阮兜，我就愛先共你紹介阮兜的人，我的爸爸是一个做代誌誠認真、真顧家的好爸爸；阮媽媽是一个美麗大方、溫柔體貼的好媽媽，我閣有一个古錐的小妹，佮一个愛哭的小弟，平常時仔，阮兜上鬧熱的時陣，就是阮小弟哭的時陣，講著遮，恁一定真想欲知影，為啥物阮兜上鬧熱的時陣，就是阮小弟哭的時陣，這馬我就來講予你聽。 阮彼的愛哭的小弟這馬才三個外月，平常時，伊除了睏佮食的時間以外就是哭，