唔捞学生饭盒波仔攻陷无饭夫妇-KTGSS.docVIP

商場脈搏（1008期 2.7.2009） 唔撈學生飯盒　波仔攻陷無飯夫婦 豬流感令全港小學停課，部分中學亦選擇提前放暑假，導致學生飯盒供應商損失慘重。惟主攻學生飯盒的陽光一代卻能置身事外，皆因它早已將其飲食王國轉型，大搞波仔叮叮飯；經過八年摸索，見時機成熟，成為叮叮食品一哥，遂決定下學年起撤出學生飯盒市場。陽光一代如此大膽，無非是學生飯盒的利錢淡薄，而且掣肘甚多，加上老闆羅開彌認定現代人生活文化已變，家庭「煮」婦已逝，遂落力為無飯家庭解決三餐需要。 羅開彌笑言每天都試食波仔叮飯，「我日日都會試食，水準跌咗我一定知。」 本港上月中學校開始停課，令一眾學生飯盒供應商大為頭痛。替二十多間學校供應飯盒的美利飲食董事經理陳煒治大呻，損失逾二十萬元，「訂咗嘅蔬菜唔留得，要全部掉晒，仲要退番飯錢俾學生，伙記又要照出糧，總之有支出無收入。」七月初本應是各學校的「試餐」旺季，用以揀選來年的供應商，但不少學校卻因流感爆發而取消有關安排，「而家應該係行內爭客高峰期，但學校無再同我哋傾試餐安排，我哋都好難做準備。」經營學生飯盒生意的聖雅各福群會負責人黃小姐說。一眾供應商叫苦連天，但有「飯盒大王」之稱的陽光一代老闆羅開彌，卻笑言停課對公司沒甚影響，「我哋只會預備翌日嘅訂單，所以唔會浪費好多食物。」有行內人表示，陽光一代在學校飯盒的市場佔有率早已回落，「以前佢係行內一哥，但近幾年俾大家樂爬頭。」其實羅開彌早已半放棄學生飯盒市場，改為力谷旗下的「波仔」叮叮飯，他甚至對記者誇口：「今個暑假之後，我哋唔再做學生飯盒，集中資源谷波仔。」他說流感爆發，竟令波仔生意有增無減，「學生停課，家長要照顧小朋友唔得閒煮飯，我哋生意仲好咗。」 小學於上月中全面停課，供應商要扔掉預備了的飯盒。 飯盒市場如雞肋 「飯盒大王」撤出學校市場，無非是這門生意限制多多，他說：「每逢學校假期，都無生意做，而且呢個市場愈來愈多人加入，好難再發大去做。」有行內人表示，每個飯盒毛利只有兩元，而且學校更會經常找供應商「贊助」各種教學器材，導致飯盒生意變成雞肋。羅開彌早已知悉這弊病，一年起決定兩條腿走路，趁生產學校飯盒的空檔時間，善用廠房設施，推出「波仔」叮叮飯，「改名最緊要夠響，波仔飯同煲仔飯發音近似，易記嘛，而且仲有埋微波食品嘅意思。」大學修讀設計系的他，更為波仔設計了紅色的搶眼標誌。為求穩陣，最初推出的波仔飯，參考最受學生歡迎的豬扒飯及粟米肉粒飯等，放於超市售賣，平均每盒售十六元，較其他品牌稍平，「我哋薄利多銷，但用料唔差，所有飯用金象米，仲投資咗幾千萬買部蒸飯機。」波仔推出一年，外間反應不俗，羅開彌索性開設專門店，「放喺超市賣，好難突出自己品牌，而且仲要俾上架費。自己開鋪容易控制貨品流量，形象又鮮明啲。」 波仔與陽光午餐共用將軍澳的廠房，佔地達數萬呎。 自設專門店響朵 他主力於公屋商場開鋪，貪其租金相對便宜，每間店的面積約五百呎，「最初睇準屋邨多一家大細，買完飯盒行幾步就返到屋企，夠晒方便。」現時波仔已擴展至八十間分店，九成集中於公屋商場，正部署進軍私人屋苑，「嚟緊會去東涌開鋪，實行遍布港九新界。」為了保持人氣，波仔仍有在超市發售，但僅限數款較受歡迎的菜式；相反專門店卻有五十多款供應，甚至有瓜菜、串燒及糖水等，是全港款式最多的微波食品。羅開彌乘機踩對手一腳，「波仔可以直接放入微波爐，但你睇日清，叮前一定要加水，無我哋咁方便。」他又將波仔飯分為速涼和急凍，前者以攝氏四度冷藏，分量較多，可保存三十日，後者的分量少，並要存放於冰箱，但優點是可保存一年。他指兩者的營養價值相差不遠，「速涼飯盒分量可以多啲，因為加熱時間短。但有啲客比較鍾意急凍嗰種，雖然細盒，但貪佢擺得夠耐，唔驚過期。」 專門店大多設於公屋商場，估計每間鋪的租金約一萬五千元，內有手推車，恍如微型超市。 照顧「三無」家庭 住在將軍澳尚德邨的李太，是波仔常客，每星期幫襯兩次，「個仔一放假我就會買，屋企人少，煮飯好難預分量。波仔有咁多款式，唔會咁快食厭。」而店內更設有四部微波爐及座位，方便客人即叮即食。為了增加新鮮感，波仔頻頻轉換款式，例如剛推出了和風豚肉飯，並將新口味放於當眼處及提供試食，吸引客人注意。羅開彌經常研發新菜式，但他不諱言曾有撞板經驗，試過推出米線系列，因不受客人歡迎已迅速停產，「受歡迎嘅飯盒就繼續生產，寧願做多幾種選擇俾啲客揀。」 每逢有新款式推出，專門店都會搞試食。 李太每星期都幫襯波仔，最愛咖喱豬扒飯，「咖喱味道啱啱好，唔會太辣。而且啲豬扒真係有肉味。」 他指香港新家庭不愛煮食，但又貪新鮮，故除了數款王牌飯盒外，會定期推出新口味留客。數月前，波仔推出每款十多元的叮叮菜，大受OL歡迎，「平時出去食晏選擇少，又好油膩，叮叮菜感覺健康啲。」任職文員的