日出阿里山.PDF

                    客(大埔)／懷想／☆☆★★  日出阿里山   記得第一擺去阿里山既經係十外外年前个事咧！該當時還當後生，同共下讀大學个同 學，為著愛看盡有名个阿里山日出，三光半夜對臺中騎奧多拜，一路戰上阿里山，對鬧熱个 臺中市騎到恬靜个嘉義，斡入山區，人家越來越少，路項也無麼个車上下，隨核山勢越來越 高，感覺著越來越冷，騎五六點鐘久个奧多拜，正到阿里山个收費亭。車一停落來，正試著 兩隻手捉捍多路捉去又麻又痠軟，屎朏也疾去硬硬坐車凳無核，兩蕊目珠吹風吹去紅紅紅， 鼻水緊流，歸身寒去激激顫，毋過心肝頭感覺著已燒暖，因致世界有名个景色，跈核斯看得 著咧！ 無想著，無恁該喢，吾等買無火車票，火車票早早都分先到个人客買撇咧，恁遠个路頭 都飆到位咧，哪使得空手倒轉去？吾等後生人毋認輸，六個細阿妹講好愛用行个，跋上祝山 去看日出。  對阿里山火車頭脣个山路行往上，吾等手牽手，一開始還有講有笑，毋過，歸片山林暗 摸胥疏，正經摸鼻公都毋著，連恁遠、恁遠一支个路燈，看來也特別孤栖，路脣烏烏个樹影 像伸長手个妖怪，比人過較高个草埔，像隨時會有麼个跳出來，當得人畏。吾等越行越驚， 逐儕頭沉沉緊行，心肝肚緊念阿彌陀佛、觀音娘、媽祖婆，腳步越行越遽，路項做下都係細 石卵，腳另落去，斯會矻矻叩叩響，行越拚斯越大聲，當像係有人在後背緊逐，吾等驚去半 行半走，十一月个天時，逐儕走去鼻鼻噗噗、大汗披身。毋知行有幾久，遠遠看著祝山火車 頭光華華个電火，吾等歡喜都跳起來，心肝頭正安定落來。  五點外，吾等同當多遊客共下尖在祝山个平臺等日出，烏烏个天慢慢轉做淡青色還帶有 白含白含，烏烏个山崠頂也車核一條金金个布脣十分打眼，大家目金金看緊山崠頂，驚怕一 敨氣、一目，斯無看著日出个美景。天色緊變，原旦白含白含个天變做淺淺个青還摻核淰 黃、粉紅、粉茄色，有幾蕊細細柑黃色个雲浮在天頂，一條絲帶樣个白色濛紗圍在山前；六 點三十分，天色緊來緊光，慢慢一屑金色探出山崠頂，天頂个雲變做金色、該條山个圍巾也 染著金粉，遠遠山凹个雲海也對白色變做柑黃色，山背个金色先一屑、一角、半粒、歸粒， 一目个時間日頭斯跳出山背，千條萬條金色光線一下斯射出來，天光咧！山林醒咧！坑水 也醒咧！金金个日頭光輝照大地，靚靚个一日開始咧！  同好朋友做下歡喜都奈毋得，昨暗晡在暗暗夜色肚趕路个辛苦同青驚，也分日出个光 輝照去打毋見咧！第一擺，對日出有恁深个感動同想望。  恁多年過撇咧，該當時个細阿妹做下都變做細人个阿姆，毋過，還記得該日日頭跳出 山背時个光輝，還記得後生時日出阿里山个感動。  作者:徐姿華  ☆詞彙學習☆ 【十外外年】shibˋ nguaiˋ nguaiˋ ngienˇ ：十多 【車……布脣】cha+ buˋ shunˋ ：以針車縫製布 年。 邊。 【無恁該喢】moˇ an^ goi+ saˋ ：沒有這麼容易。【打眼】da^ ngien^ ：很搶眼、很醒目。 【大汗披身】taiˋ honˋ pi+ shin+ ：汗流浹背。 【青驚】ciang+ giang+ ：受到驚嚇。 《臺灣客家語常用詞辭典》：.tw