南四腔-106全国语文竞赛.DOC

106年全國語文競賽客家語朗讀文章高中學生組（南四縣腔） 編號1號 【??个隔壁鄰舍】黃詩婷原作 人講：「近鄰贏過遠親！」確實無毋著，??等生活當中，盡多事情無辦法單人獨馬去完成，需要隔壁鄰舍來手，故所，歇啊上家下屋會相照顧个社區，係盡幸福个。 歇啊吾上家个人，大人細子都盡良善，對人盡好。該做阿婆个，堵著熟事人都係開容笑面个相借問，看著毋熟識个，乜會同佢頷頭，打招呼！佢兩公婆，無論莊項麼人屋下做好事、也係歪事，無就廟項做鬧熱，都會義務踏過去手，對左鄰右舍乜蓋親切，蓋有人緣，大家都盡好同佢等打嘴鼓。厥倈仔、心臼盡賢孝，畜个細人仔，講話細聲細義，蓋有禮貌，盡知人我、知上下，分大家盡阿！ 歇啊吾屋下對面个阿婆盡煞猛種菜，每日臨暗頭都會去菜園淋菜，佢講，自家菜園種个菜無農藥，又盡萋，食起來過安心！故所，每擺有收成，都會送菜分??等煮來食。 斜對面个阿公盡樂線，生活態度係「手痛好過家，腳痛好繡花。」不時會看得著佢在禾埕項，坐啊在矮凳仔項鋸弦仔、唱山歌，分人聽著盡爽快，無愁無慮！下把仔，??乜會跈等吾公過家去厥屋下泡茶、尞涼，聽佢等講古，感著盡趣妙，分??體會著「敬老得福，敬禾得穀」个道理。 毋過，歇啊吾下屋个人，煩惱過多！兩個倈仔盡毋聽教、毋像人，兩兄弟歸日仔吵吵鬧鬧，吵事相罵，惡桀桀仔，還長透相打相捶。做爺哀个講無兩句，佢等就頸偏偏仔、眼撳撳仔，像愛食人仰仔，連厥爸、厥姆都毋敢管教，不時譴到胲滿肚飽，正式係「敢死，閻羅王都驚。」毋單淨影響著莊項个安寧，大家乜心寒膽顫。堵著恁呢个鄰舍，實在愛有相當个度量。 除忒該家人，??个隔壁鄰舍大體都會互相照顧，放尞日出去，乜會手掌屋。每禮拜六朝晨頭，還看得著蓋多義工阿伯同伯姆，拿等掃把同畚斗，在該掃大路、拚垃圾、清水溝！表現出大家團結合作、愛護社區个精神！係講莊項辦活動，廟坪做大戲、打醮、迎神做鬧熱个時節，大家會同心協力、互相手鬥鬧熱。 106年全國語文競賽客家語朗讀文章高中學生組（南四縣腔） 編號2號 【毋會熄核个一杷火】黃碧清原作 每一個人心肝肚都有一盞光光个燈火，??乜有一盞燈火歇在心肝頭，這杷跈??已經蓋多年个燈火，緊來緊光。 小學畢業該年家鄉還毋曾有國中，故所學區分到「」，見堵著落雨，準講係落雨毛仔，車枋就無駛吔，上下課時係無赴著車枋，就愛用行路去學校，歸屋下乜共樣，一轉路最無乜愛三點零鐘，實在有罅遠。記得正開學三個零月个一日，因爭英文課大家無認真，歸班仔留下來複習。??毋敢同先生講愛赴車仔，戇戇吔跈大家共下留到五點下課，搶快三步做兩步飛等去赴車仔，走到兩腳無揬地害??氣凹凹吔，到車頭時車仔早就走核吔！人生路不熟，天色緊來緊暗，仰結煞正好？ 堵好一枋往苗栗个車枋，共快上車到銅鑼盤車，轉到雞隆仔已經七點零，天時早就斷烏吔。山路彎彎斡斡無電火，歸屋下个路暗疏疏吔，風幼幼个聲同狗吠聲攞等夜色陪??慢慢吔行。一個人孤孤栖栖行到差一息就愛噭个時節，遠遠看著一點光搖來搖去緊來緊兼，耳公脣接等聽著「阿清仔」，咦？熟識个聲音！電火慢慢仔停在??面前，係阿爸！ 話講臨暗日頭漸漸落山背，妹仔仰還毋曾歸屋呢？阿爸著急到連飯也無食，拿等手電筒就來車頭接厥滿女仔。看著阿爸該下，含等个目汁濛核目珠看路都毋著，??蓋感心細細聲講：「阿爸，感謝你！」阿爸拿等手電筒恬恬吔在吾屎背尾陪等慢慢仔行，歸到屋下看著阿爸烏金烏金个面項淺淺个笑容，該係安心。屋下人平安坐等共下食飯，幸福个味緒醹到化毋開！ 自??知人我以來，阿爸罕得?，還細時看著會驚，到??畢業在外背食頭路、結婚做哀仔，漸漸仔感覺著爺哀惜子个心情。在外國食頭路該幾年，思念陪等??在他鄉个每一個暗晡。愐著阿爸參加??个畢業典禮，放下山事來回三點鐘个路程來參加家長會，借自行車載??去分先生看。阿爸个愛一點一滴囥滿思念个心，阿爸个叮嚀像天頂一??一??个星仔點光??个人生路。阿爸來接??个這杷電火，陪等??行過礫礫矻矻，行正每一步腳。這杷思念个燈火，在吾心肝肚裡背緊來緊光，一杷毋會熄核个明燈。 106年全國語文競賽客家語朗讀文章高中學生組（南四縣腔） 編號3號 【阿爸个自行車】鄒瑞梅原作 阿爸个雜貨店，開在莊頭，店項不時放一臺烏金烏金个自行車。阿爸个雜貨店細細間吔，雖然看起來毋打眼，但係賣蓋多東西，樵、米、油、鹽、醬、醋、茶項項有，番鹼、面盆仔、掃把也毋會少，還有細人仔好食个零嗒。店面細罔細，簷頭項乜無打爽，阿姆好手藝，熱天賣透心涼个仙人粄冰，寒天賣燒熝熝个豆腐花，人客歸日啾啾滾，長透有老主顧尖揫在店項看電視、打嘴鼓，無論麼个鼻屎樣仔大大細細个事情，大家都在店項講，像係細叔婆做生日、王屋嫁妹仔、阿德伯討心臼，上屋下屋麼人愛蒔田割禾仔，阿爸第先知，嗄變做莊頭个報鑼仔。 歸莊頭講起來，阿爸一等煞猛，無論係發風落雨，也係日頭烈烈，長年透天都無放尞日，每日開店門做生理。店