放学了后.docVIP

放學了後 各位評審老師，各位參賽的同學，大家好。今仔日，真歡喜有這個機會來參加這個比賽，希望大家會凍多多指教。若講了好，大家撲仔聲（掌聲）盡量給伊催落去；啊那講了歹，大家物件勿通黑白丟。好！勿通擱落下頷啊！咱就開始今仔日的主題。我今仔日所欲演講的題目是--------放學了後。 現代的囝仔人真可憐，因為飼大人工作無閒，所以在放學了後，攏要去補習班補習，或者是去安親班請人顧。尤其是住在市內的囝仔，擱卡嚴重。大家想看麥咧！在學已經坐一天啊！放學了後，擱要去補習班坐，是不是真可憐，坐嘎腳瘡攏強欲裂邊！好佳哉！我是一個庄腳囝仔，阮彼個庄頭足偏遠ㄟ！阮彼附近攏無補習班和安親班。而且阮媽媽是一個家庭主婦，所以我毋免去花錢請人顧。也因為按呢！我才有一個快樂的放學時間。 我每天放學返去厝，就先跟媽媽報告我今仔日，在學校發生什麼心色的代誌，這是阮母啊子的共同討論時間。這個時陣媽媽攏會準備一寡仔點心乎我吃，伊講：「囝仔人當咧大，半埔仔攏卡敖腹肚餓，要吃淡薄仔物件，卡袂餓到。」所以，恁看我的體格，就會凍看出阮媽媽對我有外好，恁有欣羨否？ 跟媽媽討論煞，媽媽就欲去準備暗頓啊！我就趁天還沒黑，煞緊將椅啊！桌啊！搬出來門口埕，寫老師今仔日所出的功課，功課寫了到天黑之前，就是我自由的時間啊！大家不通認為我這段時間攏在外口，四界咧趴趴走，其實我攏利用這段時間去菜園仔給阿公、阿嬤湊相共。捉蟲、摳草、沃水這是我尚愛做的工作。不僅阿公、阿嬤歡喜，擱會凍練身體，尚重要的，就是會凍替阮媽媽作公關，減少擔家媳婦之間的問題。大家應該知影，在一個大家庭內，這是一個足重要的課題，恁講是不是咧！ 代誌無閒煞，若還有時間，我才會去找隔壁的哥哥姊姊七逃。有當時仔！阮會去挖蚯蚓釣魚仔！有當時仔！阮會車仔騎咧！去庄頭、庄尾，旋旋、撈撈咧！若看到熟悉的人，就跟人問好；別人若有代誌欲聯絡，阮就馬上去替人通報。庄仔內的人攏講阮是「報馬仔小組」，有趣味否？不過，有當時啊！嘛會出差錯吶！有一擺，有一個阿嬤欲找翁，就跟阮問講：「啊！恁有看到某某人否？」阮就順嘴應講：「有啊！伊在廟口咧博十胡仔。」講煞，隨聽到：「這箍死人，擱給我跑去博繳，恁祖媽絕對欲乎伊好看。」啊！死啊！出包啊！緊溜！我什麼攏無講！ 啊！有人勒問講：「啊你攏毋免讀冊喔！按呢考試甘有法度？」唉呦！我現在干擔讀國小ㄟ爾爾，毋免赫緊張啦！只要在學校上課認真聽，袂曉的煞緊問老師或是問同學，不通丟咧攏不采；在厝裡的功課認真寫，不通攏不交，按呢就會使啊啦！恁講是不是咧！ 我的演講就到這裡，感謝大家！