客家山歌男女对唱.docVIP

客家山歌对唱 隔远看妹笑嘻嘻，手拿花伞是乃里，今日有缘见到面，汝矛老公崖矛妻，来是花园嬲下佢。 崖经来话阿傻哥，看汝唔傻又好傻，傻仔也少寻妹嬲，想嬲就来唱山歌，唱到二人来拍拖。 阿妹爱崖唱山歌，可惜阿傻歌唔多，大家话崖傻古哩，只会学晓掌牛歌，有人唱歌就来和。汝话唱歌就唱歌，汝话打鱼就下河，哥拿竹篙妹拿网，随汝撑到乃条河，二侪来唱调情歌。正月里来系新年，约妹来去嬲花园，正月嬲到十二月，一有空闲就行前，几多好话讲唔圆。春天一到百花开，傻仔今铺约妹来，听佢讲到有情义，好比山伯祝英台，一只尖来一只外。二月约妹喜洋洋，二人牵手淡心肠，来去花园看花树，看妹花树系象当，红花开放等情郎。红花开放吐芬芳，看哥是否带花狼，约系有心寻妹嬲，慢慢欣赏妹花场，蝴蝶恋花花恋郎。三月约妹淡心情，阿哥对妹系真诚，今日打只金戒指，送奔阿妹戴在身，汝爱记得哥人情。阿哥有情妹有情，送哥一条花手巾，手巾肚哩七个字，永久千秋唔断情，单爱阿哥一只人。四月约妹嬲花园，难得阿妹开句言，阿妹虽然对哥好，阿哥家穷有矛钱，看等有缘变矛缘。老实对哥一个人，阿妹唔系拔钱癫，因为崖系客家妹，只讲情义唔讲钱，矛心阿哥爱靠边。五月约妹到码头，二人坐船下惠州，大风吹船摇摇摆，问妹风流唔风流，茣怕大船撞石头。端阳佳节空心肠，包好棕子等情郎，等到情郎欢欢喜，棕子好食甜又香，眀年今日又来尝。六月约妹话娇莲，又爱刈禾来莳田，农民辛苦望收刈，阿哥辛苦为娇莲，问妹几时行得前。看哥做到咁可怜，崖帮阿哥来莳田，难为阿哥咁辛苦，阿妹有苦也难言，心甘情愿结姻缘。七月约妹哥又愁，阿哥矛钱奔人愁，立嫲穿督烂衫裤，煮歺小菜都矛油，阿妹来到唔敢留。劝哥心头莫去愁，有情阿哥妹难丢，人穷就爱有志气，同心合力做到有，穿督立嫲外出头。八月约妹看月花，拿出月饼好细茶，郎食月饼甜到肚，妹食细茶开心花，合心全胆崖二侪。傻仔阿哥乐悠悠，约妹赏月过中秋，中秋之夜月色好，照亮哥妹得心头，食里月饼迎冬秋。九月约妹过重阳，同妹登高望远方，清山绿水风景好，八角凉亭好嬲凉，同妹紧嬲情紧长。哥妹登高开心肠，观音台前去烧香，阿哥烧香妹点烛，双双求拜观音娘，保佑崖俩结姻缘。十月约妹食杨桃，让般唔见崖阿娇，以往约妹早己到，唔见阿妹心就焦，莫非阿妹吊崖乔。傻仔阿哥心莫焦，阿妹爱哥心一条，哥系牛郎妹织女，七月七日来探桥，哥妹相见乐逍遥。11月约妹嬲花园，隔远看到崖娇莲，有情阿妹看得出，快步来到哥面前，俩眼含情笑莲莲。哥妹牵手心想莲，真心同哥嬲花园，妹同哥嬲唔愿转，借问阿哥一句言，几时二人结姻缘。12月约妹来过年，可惜家穷又矛钱，又矛新衫矛年货，唔敢带妹转家园，看来还爱等明年。好牛耕田唔驶鞭，好哥连妹唔驶钱，阿妹爱哥人品好，心甘情愿奔哥连，结成夫妻到百年。