歌仔戏兮困境—袂晓吟诗法兮时.DOC

PAGE PAGE 1 歌仔戲兮me5角—袂曉吟詩法兮時 歌仔戲是咱台灣兮戲劇,是咱台灣人精神上,上重要兮藝術文化之一。咱若會凍tiann7 tiann7看歌仔戲,咱兮心靈會得著安慰佮寄託。精神上嘛卡袂出問題。簡單講,咱兮生活會加真快樂。 歌仔戲兮困境,第一:字數固定七字,第二:無專業兮作曲家加入創作,第三:無國家資源大量加入,第四:道是會曉吟詩法兮歌仔戲演員,愈來愈少。致使引起詩樂小khua2仔kenn7 kuainn7(kenn7 kuainn7道是衝突,道是無和諧)兮情形,詩,道是字句,樂,道是唱曲。所以,佇歌仔戲兮戲曲頂面,道會出淡薄仔問題,使戲曲兮美感損失一點點仔,戲詞兮傳達嘛失去一點點仔。 西洋兮歌劇,是每一齣戲兮戲文、唱詞攏無仝,唱兮曲嘛攏無仝,所以,無字數兮限制,但是卜好聽道真無簡單,一齣戲有遐濟首曲,卜逐曲攏好聽是真困難。歌仔戲道是佮好聽兮曲調,一條仔一條保留落來,重複過去兮音樂創作,填入新兮戲文、唱詞。但是,新詞卜填佮原本唱曲兮詞仝款聲調兮字句,根本是無可能兮。所以,新填兮詞,道有幾字仔佮原本兮曲調是無合兮。古早兮歌仔戲演員是為細漢道綴戲班,逐工咧看咧聽,近老演員學戲、學唱、學身段、學表演法…等等。所以,古早兮演員伊會曉以新詞來唱戲曲,道是講,新填兮詞佮原本兮曲無合兮時,是以新詞兮聲調來唱,所以曲有一屑屑仔是佮原本兮曲無仝兮。舉例來講,若是原調是第五聲上揚音,音樂嘛是上揚兮,但是,新填兮詞若是第一聲峘平音,曲調愛改做峘平音兮曲調,若是新填兮詞是第二聲下墜音,曲調自然愛ka7原本上揚兮曲調,改做下墜兮曲調,以音樂表示道是:原本唱3 5(mi so)愛改唱5 3(so mi)。 所以,問題道來囉,新兮歌仔戲演員,真濟唔是自細漢道綴戲班,所以,無法度以新詞唱曲調兮能力佮膽量。因為,歌仔戲兮調有百外種,卜學佮真爻唱,道無簡單,而且會 ka7歌仔戲調當做經典,唔敢改曲調。即代兮音樂修為是西洋式兮卡濟,會以曲調唯先來唱詞,按呢,戲文傳達兮功能道會失去一屑屑仔,歌仔戲兮困境道發生囉!