长篇弹词《玉蜻》20回）听录唱本.docVIP

长篇弹词《玉蜻蜓》（20回）听录唱本 表演：蒋月泉、江文兰 第一回：问卜之一 (表）金张氏，因为男人金贵升三月初五出去，咸，叫啥几个月下来影踪全无，格个苏州城倒喊翻转来覅想寻得着。当家人，哪哼勿急呢？那么勒浪昨日夜里，六月底，到喊垂夜快，忽然一阵风，吹到房间里，妆台浪向格面团圆镜啦，迭到楼板浪“啪嗒”么，一跌两爿。格其实打碎面镜子么有啥道理？叫“万物赴无常”。才什梗倷买仔一面镜子一生一世勿坏是，镜子店覅关门嘎？喏，所说因为男人出去仔勿转勒，倒喊泥土气则。格妆台浪格团圆镜是家祠里向格，团圆镜打碎看上去就是勿团圆格意思。娘娘泥土气，马上拿王定喊进来，依仔娘娘格心浪明朝七月初一呀，到庙里向去烧香求签，问问凶吉。那么老总管王定说格个勿绝格，倷女流之辈到庙里烧香？大爷亦是勿勒屋里，勿大好。娘娘倷倘使真正泥土气么，阿要什梗，伲去请个瞎先生到屋里，来动动课筒，问卜勒算命，来问问吉凶看。格么娘娘说蛮好喂，啥场化去喊呢？说伲金夹里格老房客，山堂浪向格胡瞎子，俚格名字叫胡宗宪，才叫俚胡铁口，亦叫俚胡半仙，本事蛮好。那么俚么老房客，假使俚算到伲大爷勿大吉利啦，我刮句俚声，喊俚外头覅多缠，格么省得格种七、八两房来夺家当。格金大娘娘想蛮好。那么要明朝去喊得来，朆晓得金夹里格班丫头、阿妈、娘姨听见明朝要起课算命么劲道来则。吃饱仔实在呒啥做，俚笃是唯恐天下不乱，什梗一来明朝可以看算命则。格班丫头、阿妈、娘姨沸沸扬扬一讲么，消息传出去，定规拨勒七、八两房晓得。金夹里格近房一紧要来夺家当，现在晓得金大娘娘泥土气，生怕男人覅勒外头不测，格么来得正好！晓得要去请胡瞎子么，胡瞎子俚笃也认得格呀！天也黑则，赶到胡宗宪屋里，关照明朝金夹里喊倷起课算命，倷板要说金贵升死勒外头。伲格里向倘使弄着点油水么，倷有好处，明朝倷到金夹里去倘使勿什梗说，格么叫声倷胡先生，伲金夹里有两个丫头才搭伲认得格，划线头格，倷山塘浪向瞎子格生意要么覅做！而且拿金大娘娘几岁，金贵升几岁，金贵升哪哼格事体，金大娘娘哪哼格情形统统才讲拨俚听。胡瞎子急得一夜天朆困着呀！明朝到金夹里去，要说金贵升死脱么，格金大娘娘不得了！打巷门，闹厅堂，别人家才叫俚雌老虎格！而且我欠俚笃房钿，倷看哦，银子么呒拨，拨俚吊起来刮煞么有份。瞎子今朝七月初一到喊坐勒此地坐起地勒浪上心事。格么胡先生哪哼样子呢？一个长笼面孔，身体瘦得来，头浪向一个发簪。天热勿过呀，格别人家有格么是玉格，骑发簪，有格么金该，推诿点么钢香格。俚么也实在蹩脚，一根棒梗头，弄扦光饽荠格。身浪向一件夏布格长马甲么，两条臂巴习习细。赤脚，拖鞋皮。叫啥格胡先生，格辰光生意是好格，近来一塌糊涂，欠得金夹里格房钿结格罗多。啥体么？空心饭呀，啊呀，那么格个倒喊断命生意越好么越好，倷江湖决用勒浪是，好得来，灵得来，生意推也推勿脱！倷江湖决用得勿得法，一勿灵倒喊马上勿灵，因为俚脱脱空空格，哪是样样勿灵哉。倷覅说起课算命，伲说书也什梗格。有甚时自家弄勿清爽格，哈由！好起来好得热昏，说错仔也好格，格勿灵起来倒喊总归勿灵。倷好起来，倷登勒台浪劲道足，“乒乒乓乓”跳，听客一看，哦，好！精神，精气神，听勒浪有劲格，亦好格。倷声音说得低总推诿？亦灵格，炉火纯青，六月里听俚格书勿出汗格倷看。倷辰光说得长点亦好，越是有本事倷看越是巴结，到该格辰光还覅下来来，有道理。格么说得短点总听客要跳起来？亦灵格！听书勿在乎仔长短，叫得好听，俚也晓得伲吃力，让伲早点转去勒勿知啥，亦灵格！倷勿灵起来倒喊局局勿灵，倷说得响点亦勿灵格，啥体啊？哇啦哇啦，吃饱咋？啊咦，穷心穷恶，用勿着关！说得低点亦勿灵格，格娘东西夜饭也朆吃饱，赛过叹气，倷看哪哼道理？那么晓得下头听客勿受么，想巴结点，辰光说得长点，讨厌，倷看让，丘戏多锣鼓，哪哼还覅完勒呢？我倒也勿懂！倷说得短点么亦要跳起来格，抢铜钿，搭格仙鹤叫什梗，啊？一来兴已经呒拨咋？到喊样样勿灵。因为倷说书要说得好勿是容易，勿是单喉咙响点就好解决问题格。才什梗倷叫得喉咙响好则，叫得跳，也勿一定格，蛮难格。胡先生到喊过歇俚坐勒坐起地，天热么拿把扇子勒浪扇。而且瞎子倒喊俚扇起来啦，俚别场化勿热格，独热格双眼睛，一紧扇眼睛。我想大约要么俚看勿出啦，格个看勿出也蛮难过格，蛮闷格。倒喊出家人和尚啦，俚扇起来独扇衣裳管格，俚别场化勿热格，扇衣裳管格，因为俚格只手一紧要南无。格种桥板，抬轿子格桥板，俚别场化勿热格，俚独剩热裤腰格，因为俚“当……”出披头奔来奔去啦，容易出汗。胡先生坐勒坐起地齐巧浪咕。 胡瞎子：咳——嗯，八卦能通天地利，六爻修成鬼神机。小子胡宗宪，开爿起课店，外头挂招牌，供仔鬼谷仙，瓦香炉，木蜡扦，香烛常常呒拨点，城隍签，江东签，喷签嚼食骗铜钿，时运炉里真好过，大家叫我胡半仙，一连倒仔几年运，叫生意呒拨一点点，六荡六荡，家破人亡，我犯六荡，吃尽当光！咳——哦，自家搭自