第一课 ngaiˇ好去学校读书.docVIP

第一課 ngaiˇ好去學校讀書Ngaiˇ係小學四年生个學仔，學校在庄下，交通無麼个方便，雖然逐日愛行半點鐘去上課，ngaiˇ還係好去學校讀書。因為ngaiˇ个學校，風景靚，空氣好；設備來講，算係盡好个。學校肚有電腦教室、視聽教室、語言教室，畀ngaiˇ兜學盡多。有恁好个學校，又有熱心教學个先生，ngaiˇ樣會唔好去讀書哪？第二課 看牙齒ngaiˇ長透牙齒痛，阿姆渡ngaiˇ去看牙齒。路項，ngaiˇ當緊張，一直到醫院ngaiˇ睡到長凳仔頂，醫生喊ngaiˇ打開啄，ngaiˇ還係進驚。醫生講ngaiˇ有當多支蛀牙，有一支特別嚴重，一定愛拔弍，才唔會長透痛。一聽到愛拔牙齒，ngaiˇ就驚到會死。拉著阿姆个手唔肯放。醫生lau阿姆對ngaiˇ講盡了好話，ngaiˇ才不甘不願畀醫生拔牙齒。者時節才想到平常時無應該食東西後無刷牙齒、湯嘴，才會蛀牙。下二擺ngaiˇ一定愛注意牙齒个衛生。第三課 過新年過新年咧!年三十暗晡，出外个人，全部轉屋下，全家人食團圓飯。桌頂个菜，有代表長壽个長年菜，代表好彩頭个菜頭，魚圓、肉圓係表示全家人團圓。過新年了，有親戚朋友愛來拜年，屋肚愛準備糖仔、柑仔lau甜茶。人客來，愛講：「恭喜發財、新年快樂。」有渡細人仔來个，愛畀佢紅包，並祝福佢：「乖乖會大，會讀書。」頭擺人新年期間，做唔得罵細人仔，做唔得倒地圾，做唔得洗衫，做唔得討錢，愛等到年初五，才回復平常个生活。第四課 姐公lau藥草姐公來哩!ngaiˇ請姐公坐，斟茶畀姐公飲。姐公康健，逐日到山項採藥草，身體當康健。佢常常自家揹一隻大布袋，行山路來吾屋下，者大布袋肚有可以治百病个藥草，吾姐公會烳藥草，藥味特別好。姐公又會教ngaiˇ看各種藥草，像仙草、車前草、芙蓉、金銀花者兜。聽姐公講：「唔好小看該兜青草，一草一木都係寶，用得著來，百病就會好。」者青山綠水，唔單淨係生活个好環境，又會生藥草畀en兜人用故所，大家愛好好來保護。第五課 阿公講古頭擺有一位李先生，有一日請人客食飯，承勞仔無小心，將一碗燒湯倒在桌頂﹗流到自家个衫袖肚，又彈到李先生个褲襠，嚇到李先生面青青，承勞仔當驚就緊講：「壞勢、壞勢﹗」李先生企起來，拿出 一條手巾，人客恅倒佢愛捽自家个褲，無想到先去捽承勞仔个衫袖，佢講：「做事愛小心﹗手有熝傷無？」關心別人親像對自家个細人仔共樣。又有一擺，李先生帶pu娘去醫院看病，有一儕人有急事，走當亟，在轉角該位撞到李先生，疼到哎哎唷唷，佢亟亟用手揞著鼻公，佢問該儕人講：「行路愛小心，有著傷無？」該儕人頭蕤蕤仔，唔好意思，趕緊對李先生會失禮，面紅紅走弍了。後來，就流傳一句：「雞公生卵無趣妙，狗頭生角也無趣妙，愛看李先發譴才趣妙。」第六課 地圾大戰暗晡頭在看電視新聞个時節，阿爸透大氣講：「現代个人實在罪過，大量造地圾，者下連倒地圾个所在都無了。」「ngaiˇ乜試到，這下个人逐日都為地圾吵吵鬧鬧，唔係圍堵地圾車，就係偷偷仔倒地圾，像一場地圾大戰。人都有私心，無希望自家个家鄉變做地圾場，唔過，又大量造地圾，來傷腦筋。為到下一代个生活環境，現代人實在愛檢討一下。應該少製造地圾，特別係塑膠做个東西，更加愛少用，做得回收轉來个，就愛回收再利用。做唔得畀者場地圾大戰再打下去。第七課 風lau河壩打嘴鼓風來到河壩唇，佢lau河壩講：「汝比舊年垃圾多了。」河壩透大氣講：「無講汝唔知，該兜人日日來者位倒垃圾，骯髒个水乜倒ngaiˇ這，ngaiˇ仰唔會垃圾、唔會臭呢？」風講:「唉﹗實在罪過﹗ngaiˇ堵堵對街項過來，差一滴仔就闖走?」風講：「汝唔知，現在城市个天空烏嗦嗦，ngaiˇ飛起來就盡吃力。」河壩講：「好在有汝來看ngaiˇ，者下魚仔、蝦公唔lau ngaiˇ待共下，鳥仔乜唔飛來lau ngaiˇ講話了。」風講:「會落水囉﹗ngaiˇ愛走了。」河壩講：「愛落水了，該ngaiˇ就做得洗身洗較淨利兜仔。」風透一口大氣講：「汝莫歡喜弍早，者下落个水係酸个，淋多了對身體乜唔好。」風講弍就非走了，存河壩一儕留在該位發咄愕。第八課 去姐婆个屋下料禮拜日，阿姆渡ngaiˇ去姐婆个屋下料。 姐婆看到ngaiˇ兜來到，歡喜到啄都合唔起來。ngaiˇ過較歡喜，因為姐婆个屋下盡多人，有姐公、大舅、大舅姆、二舅、二舅姆、man舅lau阿姨，還有盡多表哥、表姐lau表老弟、表老妹者兜﹗時在熱鬧。ngaiˇ問吾姆，樣會無看到man舅姆呢？大家聽到，笑到攬肚笥，ngaiˇ害盡唔好意思，阿姆lau ngaiˇ講：「man舅mang討pu娘，仰會有man舅姆呢？ngaiˇ最愛去姐婆屋背搞，該位種盡多水果樹，ngaiˇ兜一群細人仔爬樹仔﹑賭人尋，搞到盡歡喜。去姐婆屋下料最歡喜。愛轉去个時節想到姐婆，還有該兜細人伴，就盡捨唔得離開。第九課 放料日（一）放料日，莉芳盡早hong床去公園，看到有兜人散步，有兜人做體操﹑跳