万丹红豆节-屏东里港国民小学.docVIP

萬丹紅豆節 萬丹 梁財妹 甲：「喂！阿三哥，你欲去叨位？」 乙：「哦！阿雄哦！我欲去萬丹參加紅豆仔節的活動。」 甲：「紅豆仔節？我知影有肉粽節、中秋節、冬節、元宵節，哪會毋捌聽過有紅豆仔節？」 乙：「呵！講你無常識，你擱不服，若講起萬丹的紅豆仔節，是頂港有名聲，下港上出名，己經舉行幾落屆啦！逐遍攏嘛人插插插！」 甲：「誠實咧？若按呢，我甲你作夥去，好無？」 乙：「好啊！行，我那行，那甲你介紹萬丹即的所在。」 甲：「ＯＫ！謝謝！感恩！承蒙你！」 乙：「萬丹古早叫萬舟」 甲：「萬舟？什麼意思？」 乙：「就是有足濟船仔來來去去做生理，真鬧熱的意思。」 甲：「按爾講起來，萬丹佇屏東縣來講，真早就發展囉？」 乙：「無毋著！屏東古早屬於鳳山縣，當時就設一個分衙佇萬丹，迄個時陣，屏東市還無萬丹赫爾鬧熱咧。」 甲：「哦！我知啊啦！萬丹古早是鳳山縣的副縣府，著無？」 乙：「無毋著，萬丹毋但地理好，嘛出足濟人物咧！」 甲：「我知，我知，人咧講萬丹李仔真大粒，就是講萬丹姓李的真有錢。」 乙：無毋著，萬丹李仔講的就是李開湖、李重義，in的家族真gau做生理，田園厝地一大片，連鳥仔攏飛未過，這是一點仔攏無白賊哦！」 甲：「猶擱有，人嘛咧講萬丹好地理，出足濟縣長咧。」 乙：無毋著，ui張山鐘、張豐緒、李世昌到伍澤元。 　　萬丹總共出四個縣長，所以大家攏講萬丹好地理，毋但按呢！萬丹鯉魚仔山的滾水巖，萬丹國小對面媽祖廟；猶擱有名聲透京城的萬丹時鐘攏嘛足有名。」 甲：「阿三哥，你講赫爾濟，毋拘這和咱即馬欲去參加的紅豆仔節有什麼關係？」 乙：「哦！歹勢！歹勢！我即馬就來甲你介紹萬丹的紅豆仔節。紅豆仔是萬丹的特產，因為即個所在，土地誠肥，農作物收成誠好，即搭出產的紅豆仔，又擱大粒，又擱紅，特別好食。萬丹鄉水泉社區有一寡有知識的人為著欲推廣in的產業，佇四年前就推出紅豆仔節的活動，馬上就受著大家的重視，即馬紅豆仔節己經是屏東縣誠有名的鄉土活動囉。」 甲：「阿三哥，聽你按爾講，我無想欲去啦！」 乙：「為什麼？」 甲：紅豆仔，sui是sui，若無煮嘛未當食，去踅一埔，無通食，算未合。」 乙：「呵！講你戇，你又擱不服，萬丹人是巧甲若精咧，in的紅豆仔，毋但會當做紅豆仔湯、紅豆仔糜、紅豆仔冰，佫會當做紅豆仔餅！即馬萬丹的紅豆 仔餅已經是全國有名的特產品呢！你佇台北、台中、高雄所看著的紅豆仔餅，攏嘛掛萬丹紅豆仔的名！」 甲：「so les ka？若按呢？我又擱改變主意囉！行，咱緊來去萬丹食紅豆仔冰、紅 豆仔餅，順續拜媽祖，去滾水巖看滾水。」 甲乙：行行行行行 　　　你我兩人手牽手 　　　行行行行行 　　　作夥去萬丹　　　 作夥去萬丹