猪仔三兄弟.PDF

豬仔 三兄弟 感情誠好的豬仔三兄弟，蹛佇一个攏是低厝仔的庄頭， 雖罔仝一家伙仔，食的頭路是一丈差九尺，差有夠濟。 大漢的五十出頭，又閣老實又閣拍拚，逐工四界咧做資源回收， 第二的佇隔壁庄，替人顧公寓兼收厝稅，細漢的是維護治安，保護老百姓的警察大人。 聖誕節彼工暗時，三兄弟仔攢甲真豐沛， 佇細漢的 in兜講天說地食好料的，食甲當歡喜的時，雄雄有人共門挵甲乒乒乓乓。 做警察的細漢的，對監視機仔看著咧挵門的是熟識的人，生做橫霸面又閣高長大漢， 就是予警察局通緝真久的通緝犯毋成「狼」。 毋成「狼」四界走路，悽慘落魄定定餓腹肚，伊鼻著 in當咧食的好料的， 予芳貢貢貢貢芳的芳味唌來，竟然毋知影遮是警察大人的厝，真正是落車頭無探聽，這聲穩死矣! 毋過，佇厝內的大兄緊張甲咇咇掣 ！ 手摸著褲袋仔底對回收場紮轉來的空罐仔，隨出力對窗仔外共掔出去。 毋成「狼」跤手真猛醒，棍仔攑咧隨共摃甲遠遠遠。 第二看著按呢，緊張甲手機仔提咧，四界欲揣朋友鬥相共， 毋過因為傷緊張電話號碼三揤四毋著，大粒汗細粒汗㴙㴙滴。 干焦上細漢的警察大人袂緊張，對槍袋仔底共槍提出來，「póng」一聲隨開槍。 一槍就彈著毋成「狼」手裡的棍仔，閣共伊的手彈甲著傷，予毋成「狼」袂當閣聳鬚。 這个時陣，毋成「狼」予二兄箍來的朋友團團圍牢咧， 你一跤我一拳，毋成「狼」猛虎難敵猴拳，終其尾予逐家掠起來矣。 為非作歹的毋成「狼」，予做警察的細漢的掠起來，送轉去籠仔內食免錢飯。 處罰伊佇監獄內底做資源回收，予毋成「狼」有收跤洗手改過自新的機會。