06-105年闽南语朗读比赛(社会组)_1.docVIP

01懷念古早的過年 楊文清 日頭愈來愈短，天氣嘛愈來愈寒矣。過年閣無偌久就欲到矣，予我懷念囡仔時代的過年。彼陣過年的時，毋但有真濟肉通好食，嘛有新衫通好穿，紅包閣提幾若个。若想著遮的好空的代誌，我就喙笑目笑，歡喜甲睏袂去，所以做囡仔的時，上歡喜的代誌就是過年。 以早，因為學校的規定，去學校著愛穿『khá-khih』色的制服，所以佇學校的學生囡仔，衫穿甲整齊整齊，袂親像序大人的衫仔褲，毋是破的、就是補的，無啥好看。若到過年時仔，逐家攏愛穿較媠咧，所以序大人攏會共囡仔買一軀新制服。因為讀冊囡仔當咧大，『khá-khih』布閣真??勼水，所以序大人共囡仔買的新衫攏大一號，雖然穿新衫的時，手?、褲跤攏愛撆一、兩撆，囡仔人嘛是真歡喜。 五、六十年前，臺灣是農業社會，逐家攏散赤，阮老爸是贌田來種作的佃農，閣比人較散赤。雖然阮三頓所食的已經是白米飯，毋是番薯簽飯，毋過三頓的物配，攏是家己菜園仔所種的菜蔬。干焦初一、十五犒軍拜拜的時，才有半斤肥豬肉仔通楔喙齒縫。 過年的圍爐菜就無仝款囉！阮會刣家己飼的雞仔、鴨仔，閣買寡魚佮肉，加起來有十外斤，彼當陣我是定定食甲毋知通飽。過年彼成十工所食的肉，是普通時一個月的十外倍，真正是魚魚肉肉誠豐沛。上心適的是圍爐的時，阮阿母那夾菜那教阮講好話，親像「食雞才會起家、食菜頭好彩頭、食菜豆食甲老老老、食予賰年年賰」等等。桌仔頂每一項菜攏有意義，每一項菜攏有好吉兆的話語。普通時食這寡菜毋免講好話，到過年著愛講好話，實在是真趣味！ 圍爐了後，我就踮邊仔等序大分硩年錢。阮阿母代先有交代，提著紅包的時，除了講多謝以外，嘛愛閣講：「恭喜發財、祝你事事如意、祝你食百二」等等好吉兆的話。我攏有照阮阿母的吩咐去做，結果，毋但我提著紅包的人歡喜，予我紅包的序大人嘛歡喜甲喙仔裂獅獅。 02阿猴迎媽祖 洪美芳 是一種機緣，北管許老師的起鼓，促成阮臨時組一團「二媽轎前吹」。食到這个歲看過的鬧熱陣算攏袂清楚，頭一擺實際參加迎媽祖。平常時仔士農工商的學員，攏真煩惱無法度接載親像行軍的路途，逐家盡量撨時間，隨人發心輪班支援兩工。 出發彼工，逐家冗早集合，先練習按怎踏跤步佮拜廟，吉時若到，報馬仔、各路陣頭、眾神轎攏相連紲出發。傍著這改的踩街，阮對廟的中門行出來，廟方的眾董事攑香恭送媽祖出巡。邱老師的兩下鼓聲叫阮準備，許老師的古吹奏落去，我的鑼第三拍著愛摃落去，真驚會脫箠，佳哉經驗豐富的老師沿路共阮遮的菜鳥仔鼓勵佮看頭看尾。 阿猴媽對頂一擺踅境到今已經八年矣，想欲軁轎跤的信徒已經排甲躼躼長。有一个行動無方便的阿媽無法度跪咧軁轎跤，轎班的人真貼心，先用雙手共阿媽的耳仔掩咧，較袂予傷大聲的炮仔聲嚇驚著，閣再配合阿媽的身材，共神轎牚懸懸，這予我改變對轎班的印象。也有坐佇輪椅，鼻仔插管的患者，予厝裡的人捒出來感受二媽的賜福。將爺的頭前是臺中來的北管團，雖然是囡仔班，毋過鼓吹歕甲誠有氣勢。媽祖的護衛──青面的千里眼佮紅面的順風耳，綴跤步踏進前，雙手自然前後幌振動，真有架勢。閣來就是阮佮二媽的涼傘綴佇後壁。趁歇睏的時，就近詳細看押後主神二媽的尊容，親像新娘坐佇轎內。 尾工，神轎頭前加一陣「轎前掃香路」的人，攏是隨人發心自動向廟方報名登記的，沿路提一支鹹草縛的天地掃，佇二媽的頭前將歹物仔掃掉。活動結束，彼支掃帚就提轉去，成做有靈聖的法器。為著欲表示對媽祖的虔誠佮尊敬，阮攏食全素，一日食七頓通補充體力。塗跤厚厚的炮仔烌是信眾的誠意。「三月痟媽祖」，全臺灣攏咧辦一場民俗的嘉年華佮宗教文化活動的傳承。熱情圓滿過了後，上蓋辛苦的清潔人員嘛綴咧收尾。這逝是我頭一擺的體驗，一幕一幕攏是我一世人永遠的記持。 03炊粿 洪淑昭 「看這一、二十斗猶咧硩水的粿漿，明仔載的穡頭一定嘛是猶閣誠硬篤，尤其這甜粿咧炊閣僫，明仔載你著愛較早來咧，若無，恁阿桑會做甲歪腰。」 鳳美仔雙手捀彼拄才炊好、猶閣燒滾滾的紅龜粿，跤步是三步做兩步行，對灶跤行去客廳，那行那交代替紅龜粿抹油的阿娥仔。 鳳美仔兜的廳頭，原本囤甲滇滇滇攏是做好等欲交工廠的手橐仔和電子零件，現此時已經清甲空空空，廳裡的桌仔頂、椅條佮椅頭仔頂懸，全全是炊好咧等涼的紅龜粿、甜粿。阿娥仔蝹佇壁邊，已經忝甲目睭皮強強欲瞌去，倒手彼塊碗提袂牢，差一點仔就摃摃破。鳳美仔看著，粿緊囥咧，連鞭行到阿娥仔的身軀邊，共伊手底彼塊貯火油的碗接過來共講：「今仔日天猶未光，你就來遮鬥跤手，一工無閒貼貼，連大人都感覺誠忝頭矣，莫怪你會愛睏！」 阿娥仔去予鳳美仔叫醒了後，徛佇壁邊，頭仔犁犁，感覺歹勢歹勢，喙內敢若含一粒滷卵仝款，一句話含咧糊咧講袂清楚。看伊這款模樣，鳳美仔已經臆出阿娥仔講袂出喙的心事，隨對圍軀裙的橐袋仔內底撏八張紅色十箍的紙票出來，順勢共曝佇灶跤竹篙頂的彼捾煙腸佮兩尾鹹魚提落來，交予阿娥仔。 鳳美仔吐大氣講：「雖然講恁彼个無責無